कोपा अमेरिकाको फाइनलमा अर्जेन्टिनाको समर्थन गर्न लागेका ब्राजिलीहरुप्रति नेइमार कठोर देखिएका छन् । मेसीले उपाधि जितुन् भन्ने चाहना राख्दै केही ब्राजिलीहरु आफ्नै देशका खेलाडीको विपक्षमा छन् । जसकारण, नेइमार निकै आक्रोशित बनेका छन् । उनले इन्स्टाग्राम पोस्टमा त्यस्ता समर्थकबारे लेखेका छन्,‘ठिक छ, म यसको सम्मान गर्छु, तर नर्कमा जाऊ…. जो विपक्षमा छौं ।’

‘स्नेह र गर्वसहित म ब्राजिल हुँ,’ नेइमारमले इन्स्टाग्राममा लेखेका छन् । ‘मेरो सपना सधैं ब्राजिलको राष्ट्रिय टिममा रहने र समर्थकहरुले गाएको सुन्ने थियो । चाहे खेलकुद होस्, मोडलिङ प्रतिस्पर्धा होस् वा ओस्कारमा किन नहोस्, जहाँसुकै ब्राजिलले प्रतिस्पर्धा गरेपनि मैले कहिल्यै विरोध गरिनँ र गर्नेछैन ।’

‘यदी त्यहाँ ब्राजिल छ भने म ब्राजिलको पक्षमा छु । र को ब्राजिलियन फरक कित्तामा हुनसक्छ ? ठिक छ, म सम्मान गर्छु । तर नर्कमा जाऊ… जो विपक्षमा छौं ।’

यो इन्स्टाग्राम पोस्टको कस्तो प्रभाव देखिएला भन्ने समयले नै बताउँला । अहिलेका लागि नेइमारको प्राथमिकता आइतबार बिहान माराकाना रंगशालामा हुने कोपा अमेरिकाको फाइनल जित्दै उपाधि उचाल्नु हो । नेमाइरले ब्राजिलबाट कन्फेडेरेशन कप र ओलम्पिक खेलकुदमा स्वर्ण जितेका छन् । तर, कोपा अमेरिका जित्न सकेका छैनन् ।