रामेछाप । गोठगाउँ सरोकार समाजद्वारा आयोजित वडा स्तरीय भलिबल खेलको उपाधि गोठपानी बचत तथा ऋण सहकारी संस्थाको टिमले जित्न सफल भएको छ । दशैंको अवसर पारेर आयोजना गरिएको भलिबल खेलको फाइनलमा साविकको वडा नं ७ को ए लाई हराउँदै गोठपानी सहकारी टिम विजयी भएको हो । त्यस टिमले सबै खेल सोझै सेटमा जितेको थियो ।

प्रथम हुने टिमले नगद रू २०००० सहित ट्रफी र मेडल प्राप्त गरेको छ । त्यसैगरी दोस्रो स्थान हासिल गरेको ए टिमले रू १५००० सहित ट्रफी र मेडल प्राप्त गर्न सफल भएको छ । कल्पेश्वर युवा क्लबलाई हराउँदै साविकको वडा नं ८ को टिम तेस्रो स्थान हासिल गर्दै नगद रू १०००० सहित ट्रफी र मेडल प्राप्त गर्न सफल भएको छ । कल्पेश्वर युवा क्लबले सान्त्वना पुरस्कार नगद रू ५००० प्राप्त गरेको छ ।

श्रीचण्डेश्वरी मा.वि स्थित ग्राण्डमा भएको कार्यक्रममा भलिबल खेल हेर्न करिब एक हजार दर्शकको उपस्थिति थियो । असोज २७ र २८ गते भएको कार्यक्रमको बीचबीचमा भिन्न नित्यसमेत प्रस्तुत गरिएको थियो । चर्को घाम र धुलो उड्ने खेल मैदानका बाबजुद पनि दर्शक आफ्नो टिमलाई हौसला दिन हुटिङ लगाउँदै सहभागी बनेका थिए ।